Ձեր վստահելի աղբյուրը

 Ըստ Էրդողանի նոր կառավարության հրահանգի` հանրահայտ թուրք աստվածաբան Ֆեթհուլլահ Գյուլենի հովանավորությամբ արտերկրում գործող դպրոցների աշակերտներն իրավունք են ստանում ընդունելության քննությունների ավարտից հետո ընդունվել թուրքական ԲՈՒՀ-եր: Նոր հրահանգը վերաբերում է նաև Ադրբեջանի տարածքում գործող 12 դպրոցների, հայտնում է ադրբեջանական «Haqqin.az» լրատվական պորտալը:

Նյութում նշվում է` Գյուլենի շարժումը, որն Ադրբեջանում հայտնի է նաև որպես «Նուրջուրլար» (նուրսիստներ), երկրում բավականին հայտնի է իր կրթական ծրագրերով: Երբ 1990-ական թվականներին նրանց շարժումը դեռ նոր էր իր գործունեությունը սկսում Ադրբեջանում, պաշտոնյաներն այն բավականին ջերմորեն էին ողջունում: Ադրբեջանի իշխանությունն այն ժամանակ նախընտրում էր շեշտադրումները կատարել ազգային քաղաքականության վրա, որը գոյատևում է համաթյուրքական մշակույթների կապերի, այլ ոչ թե իսլամական միսիոներական գործունեության շնորհիվ:

«Չնայած պարբերական անհաջողություններին` Գյուլենի շարժմանը հաջողվեց ստեղծել արդյունավետ ցանց, որի մեջ էին մտնում դպրոցների նախկին սաներ, բարեկամական տրամադրված պաշտոնյաներ և շարժմանը համակիր գործարարներ:
Շարժման կողմից դավանվող համեմատաբար չափավոր իսլամի և թյուրքական ազգայնականության գաղափարները արձագանք են ստանում Ադրբեջանի բնակչության մի մեծ մասի սրտում, մասնավորապես, երիտասարդների սրտերում, ովքեր այն տեսնում են որպես այլընտրանք ալիևյան աշխարհիկ իշխանությանը և իրանական թևի իսլամիզմին», - գրում է պորտալը:
Սակայն, ինչպես նշվում է նյութում, վերջին տարիների ընթացքում Ադրբեջանի իշխանությունը կասկածանքով է մոտենում այդ շարժմանը:

Հիշեցնենք, որ Ֆեթհուլլահ Գյուլենը «Նուր» կրոնա-փիլիսոփայական շարժման առաջնորդն է: Մեդիամագնատին են պատկանում նաև աշխարհով մեկ գործող արդյունաբերական և ֆինանսական խոշոր կազմակերպություններ և հոլդինգներ: Գյուլենին է պատկանում կրթական հաստատությունների և ուսումնարանների խոշոր ցանց: 1998թ. Գյուլենը մեղադրվում էր Թուրքիայում գոյություն ունեցող աշխարհիկ կարգերի տապալման մեջ: Այն ժամանակ, պատժից խուսափելով, նա գաղթեց ԱՄՆ: Այն բանից հետո, երբ իշխանության եկավ Արդարության և զարգացման կուսակցությունը, նրա դեմ բոլոր մեղադրանքները հանվեցին: Թուրքիայի վարչապետ Ռեջեփ Թայիփ Էրդողանին և ընդհանրապես Արդարության և զարգացման կուսակցությանը մեղադրում են Ֆ. Գյուլենի հետ կապեր ունենալու մեջ: Տարբեր տվյալներով` Թուրքիայում և արտերկրում (մասնավորապես Ադրբեջանում և Միջին Ասիայում) մոտ 5 միլիոն մարդ ներգրավված են Գյուլենի շարժման մեջ:

Ընդգծենք, որ որոշ երկներում, մասնավորապես Ռուսաստանում, Գյուլենի «Նուրջուրլար» աղանդը (կամ «նուրսիստները») արգելված է, իսկ դրա հետևորդները պատասխանատվության են ենթարկվում ծայրահեղականության տարածման համար: Ռուսաստանի Անվտանգության դաշնային ծառայությունում կարծում են, որ աղանդի անդամները զբաղված են հօգուտ Թուրքիայի հետախուզական տվյալներ հավաքելով և կապված են Հյուսիսային Կովկասի ահաբեկիչների հետ: